بقلم: بتول محمّد الأسدي
بعد في وقت خلونا قاعدين
نقتل ببعض و يروح المظلومين
معلش
بعد في وقت خلونا نايمين
نكفر بعض و نزعم احنا الدين
معلش
بعد في وقت لشو نتحرك
حتى اخوك ما تأمنو ع سرك
معلش
بعد في وقت خلونا نصفي بعض
و يزيد بقلبنا الحقد و الكره ع بعض
معلش
بعد في وقت لشو نصير ايد وحدة
خلونا منقسمين و كل واحد عليش بوحدة
معلش
بعد في وقت يالا ننسى القضية
ونتفرق ع فتح و الجند و الجبهة الشعبية
معلش
بعد في وقت طلعو الاهالي من المخيم
والطفل يبكي وين يخيم
معلش
بعد في وقت يالا اجازف واموت
و بالاخر بصير شهيد و بنحط بالتابوت
معلش
بعد في وقت وين فلسطين وين
وين لك لشو هالسؤال بنجاوبو بعدين
معلش
بعد في وقت عادي الام تربي ابنها ادام عيونها
و بلحظة يموت و يطلع من وجودها
معلش
بعد في وقت عادي
الاب يعمر بيتو بكل نقطة من عرق جبينو
و بتيجي قذيفة و بتهدو قبال عيونو
معلش ما ضروري تنصالح و لا نتوحد
الفرقة و الاحزاب عاجبيتنا و العار راكبنا من اجرينا لجبينا
معلش عرفتو مين احنا ؟!
احنا الشعب الي النا من ٤٨ نوعدك يا فلسطين
راجعينلك بالسيف و الدم و الدين
بس اصبري علينا شواي بنقتل بعض و بنرجعلك خالصين .